|
Шушы көннәрдә Чаллыда нәшер ителүче “Мәйдан” журналының 6нчы саны дөнья күрде. Әдәби-нәфис, иҗтимагый журналның бу саны тулысынча Әгерҗе районына багышланган.
Журнал баш редактор Вахит Имамовның “Татарстан Аляскасы” дигән язмасы белән башланып китә. Аннары район башлыгы Фәрит Габбасовның “Иж буе – татар җире” мәкаләсе урын алган.
Агымдагы елның 29 апрелендә Рәсәй Президентының үз кулыннан “Дуслык” ордены алган Әгерҗе егете, Чаллы хакиме Илдар Халиковның гасырлар буена татар дөньясының әйдәманы, горурлыгы булган затлар нәселеннән булуы турындагы язма һәм шәҗәрәсе дә укучыларда зур кызыксыну уятыр.
Әгерҗе тимер юл узелы, сугыш елларындагы Әгерҗе хәрби госпитале турындагы язмалар да тирән эчтәлекле. Татар тарихы бүлегендә Тирсә фетнәсе, Әгерҗе Пугачлары турында язмалар кызыклы. “Туган ягым – яшел бишек” бүлегендә Тирсә, Иж-Бубый, Исәнбай, Кырынды, Салагыш, Көчек, Красный бор авыллары тарихы киң сурәтләнгән. Гыйбрәтле язмышлар рубрикасында Нәҗметдин хаҗи Мөхитнең Салагыштан чыгып киткәндә 8 айлык булган малае Тәминдар әфәнденең Япониядәге язмышы татарның чит илләрдә дә дәүләткүләм олы постлар биләве турында сөйли. Күренекле якташларыбыз Давыт Гобәйди, Рифкать Гайнуллин, Сабир Шәрипов, Венера Шәрипова, Рәгъде Халитов, Ленар Мурзин, Гаяз Исламов, Дамир Бәшәров, Фәнил Латыйпов турында горурланып укырдай мәкаләләр урнаштырылган.
“Мәйдан” журналының кушымтасы “Мәйданчык”та районыбыз балалары иҗатына да киң урын бирелгән һәм алар зәвыклы итеп урнаштырылган.
Туган як күренешләре белән бизәлгән журналның бу саны – район өчен сөенечле бүләк ул.
Кире кайт
|
