Төрле яшьтәге ир-атларларны иң элек хәрби комиссар Шәһит Хәйруллин сәламләде. Инде онытылып барган армия хезмәтен кабат искә төшереп үтте ул. Ирләрне бурычларын, икенче тапкыр булса да, намус белән үтәргә чакырды.

Җыеннар 37 көн дәвам итеп, 12 августта гына тәмамланачак. Әлеге айдан артык вакыт эчендә алар өр-яңа хәрби техникада әзерлек үтәчәк, машина йөртү һәм ату курсларын кабаттан өйрәнәчәк.

Һәр чакырылучыга уңышлар теләп, башкарма комитет җитәкчесе Рәгать Хөсәенов та чыгыш ясады. Ирләрен, улларын һәм абый-энеләрен озатырга килгән туган-тумачалар белән саубуллашкан “солдатлар” автобуска утырышып беткәч, юлга кузгалды. Тәүге тукталыш Зәй шәһәрендә булса, аннан солдатлар Пермь крае, Чайковский районы, Марковский поселогында урнашкан 65327 нче хәрби частька юнәләчәк.