“КРН-2,1” агрегаты белән, “МТЗ-82” тракторында барысы 300 гектар җир урды, 25 норма-смена эш башкарды инде ул. Агрегатның 1 метр алдыру киңлегенә исәпләгәндә, 142,9 гектар җир чапкан. Иртүк эшкә керешеп, караңгы төшкәнче басуда ул. Шул ук агрофирмадан Рәшид Хәбибуллин белән Илгиз Миннекәев та чапкычларын җитештерүчән эшләтәләр.

“Игенче”дән Марат Мөхәммәтшин “ГВК-6” җайланмасы белән 307 гектар җирнең печәнен әйләндерергә өлгерде. “Тәкәнеш” агрофирмасыннан Назим Гарифуллин 254 гектар эш башкарды. “Трудовик”тан Ринат Сәйфетдинов–170, “Игенче”дән Гыйлемхан Хәсәнов–120 тонна печән прессладылар. “КУН-10” җайланмасы белән “Игенче” җәмгыятеннән Рамил Дәүләтшин 240 тонна печән төяп җибәргән. Шуннан ук  Айдар Даһретдинов “КСК-100” комбайны белән 1000 тонна яшел масса туратып озаткан. “Омар” агрофирмасының “Земля” җәмгыяте механизаторы Виктор Гурьев язгы чәчүдә беренче урынга чыккан иде. Яшел уракта да район ярышын әйдәп баручыларның берсе ул. Комбайныннан 3112 тонна масса озатырга өлгергән. Ташуда да “Омар”дан Ралиф Сәйфуллинга тиңнәр юк. “КамАЗ”ы белән басудан базга 568 тонна масса алып кайткан. Ә “Игенче”дән Рафис Сабиров автомашинасының 1 тонна йөк күтәрүчәнлегенә 87,5 тонна масса ташыган.