– “Энергострой+”  җаваплылыгы чикле ширкәт  ремонтчылары  бүген  Тукай урамындагы 1 нче йортта эшлиләр, – ди Коркачык авыл җирлеге башлыгы Кадрия Хәйбуллина. – Алар җылыту һәм канализация торбаларын  алыштырдылар,  квартираларда яңа унитазлар куйдылар. Чиратта –  түбәне ремонтлау,  хәзер черегән шифер урынына   калай түбә  булачак. Фирма җитәкчеләре бу йортны 20 июльгә тапшырырга уйлыйлар.

Икенче подряд оешмасы – “Медис” җаваплылыгы чикле ширкәт – Төзүчеләр урамындагы 1 нче йортны ремонтлый. Бу йортка 35 ел, анда да  капиталь ремонт бер тапкыр да булмаган. Биредә ике бригада эшли,  алар бер үк вакытта   түбәне ремонтлыйлар һәм җылыту, канализация торбаларын алыштыралар.

Авыл җирлеге башлыгы сүзләренә караганда, халыктан ремонтның сыйфатыннан зарлану сүзләре ишетелмәгән.