Мәгариф бүлеге тарафыннан төзелгән “Зәңгәр шхуна” программасы нигезендә укучыларга әлеге зур бәхет елмайды. Республика бюджеты тарафыннан бүлеп бирелгән 400 мең сум акчага 4 катамаран, 1 кабартыла торган көймә, палаткалар, һәр балага коткару жилеты, йокы капчыгы, җәймәләр, азык-төлек, медикаментлар һәм экскурсия өчен башка кирәк-яраклар алынган. 10 көнгә планлаштырылган йөзүдә укучылар Мамадыш табигатен күзәтеп, өйрәнеп кенә калмыйча, табигать шартларында яшәп, үз-үзләрен сынап та карыйлар.

Әлеге сәяхәткә чыкканчы укучылар Красная Горка мәктәп базасында әзерлек курслары үткәннәр, куркынычсыз йөзү кагыйдәләрен өйрәнгәннәр. Өч көн кала катамараннарны кабартып, кечкенә күлләрдә йөзеп караганнар. Нократ буенча йөзеп киткәнче, укучылар, нәкъ юнгалар сыман, ант бирделәр, гимннарын җырладылар. Балалар сәяхәт дәвамында берничә авылда тукталыш ясап, кайберләрендә палаткаларда кунып та калачаклар. Соңгы тукталыш – Пятилетка авылында булачак. Мәгариф бүлегенең төп белгече Вәзир Фәизов сүзләренә караганда, 15 июльләрдә әлеге чараның икенче сменасы башланыр дип көтелә. Анда барлыгы 20 бала катнашачак.

Рәсемдә: балалар елга буйлап  сәяхәткә кузгалды.

Автор фотосы.