Шәһәребездә ел саен оештырылып, инде күркәм гадәткә әверелеп килүче конкурс нәтиҗәләре күрсәткәнчә, халык та җәйге матурлыкка игътибарны арттырды. Берничә ел элек Мамадышта “матур” дип телгә алырлык санаулы гына йортлар бар иде. Хәзер исә андыйлар шулкадәр күп, хәтта август аенда “иң матур территория” конкурсының оештыручылары җиңүчене билгеләгәндә аптырашта калалар.

Шул ук оешма-предприятиеләрне алсак, алар да җәен-кышын бер-берсен уздыра-уздыра үз территорияләрен бизиләр. Кышын аларда зур-зур кар сыннары урын алса, хәзер, җәй айларында һәр участок гөл-чәчәкләргә күмелгән, чисталыгы-пөхтәлеге белән игътибарны җәлеп итә. Санаулы еллар эчендә шәһәребез урамнарына меңләгән төп агачлар утыртылды. Озак та үтмәс, ул урамнар яшел “коридорларга” әверелер. Ә чиста, саф һавалы шәһәрдә яшәү – үзе бер бәхет.

Рәсемдә: шәһәребез предприятие һәм оешмаларының территорияләре чәчәккә күмелгән.

Автор фотосы.