14-18 яшьлек егет-кызларны вакытлыча эш белән тәэмин итү буенча чараларны финанслау федераль һәм республика бюджеты акчаларына башкарыла. Шулай итеп, аларга айлык матди ярдәм 781 сум, ягъни эшсезлек буенча бирелүче минималь күләмдәге пособие исәбеннән түләнә. Акча Сбербанк филиалларында (бүлекләрендә) кертемнәр буенча гражданнарның шәхси счётлары аша түләнә.

Шунысын да әйтергә кирәк, балаларны вакытлыча эшкә алган вакытта мәшгульлек үзәге алар белән килешү төзи. Хезмәтләре өчен түләүләр эш бирүче хисабына оештырыла.

Агымдагы елның июль башына балигъ булмаган гражданнарны эшкә алуга мәгариф, балалар һәм яшьләр эшләре буенча идарәләр, “Кайгырту” үзәге, “Радиоприбор”, “Торба заводы”, социаль-хезмәт үзәге, теннис буенча балалар һәм яшүсмерләр спорт мәктәбе, “Билдинг-консалтинг”, 9 нчы районара җинаять-төзәтү инспекциясе, “Әлмәт торак-сервис үзәге” җәмгыяте, “Луч” телекомпаниясе, “Р.Р.Фәтхиев” шәхси предприятиесе гариза биргән. Ел башыннан барлыгы 110 яшүсмер эш белән тәэмин ителгән.