Узган ел районыбызның 2 мәктәбе берәр миллион, 6 педагог йөзәр мең сум күләмендә грантка ия булган иде. Агымдагы елда да бу юнәлештә максатлы эш алып барыла. Аерым укытучылар һәм мәктәп коллективлары грантлар яулау өчен үзләренең иҗади эш материалларын туплап махсус комиссиягә юллыйлар һәм иң сөенечлесе: куелган хезмәтләр, эш күрсәткечләре нәтиҗәсез калмый. Быел да районнан алты кеше 100әр мең сум премия белән бүләкләнде. Менә алар: шәһәрдәге беренче санлы мәктәпнең биология укытучысы Роза Зинкатова, Көек-Ерыкса мәктәбенең татар теле һәм әдәбияты укытучысы Рәсимә Галиева, 2нче санлы мәктәпнең башлангыч сыйныфлар укытучысы Зинфира Вәгыйзова, шул ук мәктәптән технология укытучысы Илнур Хәнәфиев, 4нче санлы мәктәпнең география һәм биология укытучысы Елена Запольская, Көмешкүл урта мәктәбенең биология укытучысы Газилә Зиннәтуллина.

Уку йортларыннан быел Урта Кирмән һәм Зур Шыя мәктәпләре миллион сумлык грантларга ия булдылар.