shahrichalli.narod.ru

Соңгы елларда шәһәрләрне яшелләндерүгә, ягъни ландшафт дизайнына зур игътибар бирелә башлады. Бу нисбәттән безнең Чаллы башка шәһәрләрдән (һәрхәлдә, тирә-юньдәгеләрдән) бер башка өстен тора, дисәм дә, мөгаен, әллә ни арттыру булмастыр. Әмма хикмәт аның заманча һәм зәвык белән бизәлүендә генә түгел...

Бервакыт шулай шәһәр торак-коммуналь хуҗалыгы һәм төзекләндерү идарәсе башлыгы Рафаил Кыямов белән сөйләшеп утырырга туры килгән иде. Быел Россиянең төрле төбәкләреннән Чаллы Сабан туена килгән дәрәҗәле кунаклар өчен шәһәр буйлап экскурсия оештырылган икән. Һәм шунысы игътибарга лаек, кунакларны, берсеннән-берсе күркәмрәк чәчәклекләр белән беррәттән, шәһәрнең теләсә кайсы урынында бердәй тәртип һәм чисталык хөкем сөрүе сокландырган.

Ә бит шәһәр чыннан да чиста. Ләкин бу әле Чаллы халкы культуралы дигән сүз түгел. Хикмәт шунда, бездә шәһәрне тәртиптә тоту тәгаен бер системага салынган.  Комплекслардагы чисталык һәм яшеллек өчен идарә итүче компанияләр, ЖЭКлар җавап бирә. Шәһәрнең үзәк проспектларына шәһәрне яшелләндерү хуҗалыгы хезмәт күрсәтә, ягъни Чаллының “йөзе” тулысы белән “Горзеленхоз” предприятиесе карамагында. Шул исәптән, халык күп йөри торган, чагыштырмача зуррак игътибар соралган урыннар да. Энтузиастлар бульвары, һәйкәлләр, парклар... Җиңү паркындагы чисталык һәм тәртип өчен, мәсәлән, “Горзеленхоз”ның 9нчы бригадасы (8нче участок) җаваплы. Бригада мастеры Роза Сәлахетдинова сүзләренә караганда, яшелләндерүчеләргә һәр көнне иртән бу 15 гектар мәйданны җыештырып, халык ял иткәннән соң ташлап калдырган пыяла һәм пластик шешәләрне, ризык калдыкларын җыеп чыгарга туры килә. Чисталыкны тәэмин итүдән тыш, территориядәге агач-куакларны тәртиптә тоту – яңа утыртылган үсентеләргә су сибү (агач 3 елга кадәр үзгә игътибар сорый), куакларга билгеле бер форма бирү дә яшелләндерүчеләр өстендә – соңгысы җәй дәвамында 4-5 мәртәбә башкарыла. Паркны аерып күрсәтүебез аның зуррак игътибар соравы белән генә бәйле. Гомумән алганда, шушы нибары 13 кешедән торган коллектив (дөрес, җәйге айларда эшкә берничә бала да җәлеп ителә, Роза ханымның улы биредә, мисал өчен, инде алтынчы җәен эшли) барлыгы 54 гектар мәйданга хезмәт күрсәтә.

Игътибар иткәнсездер, быел шәһәрне яшелләндерүчеләргә юл кырыйларындагы «картайган» агач-куакларны төпләп, газоннар җәяргә туры килде. Бу исә хәйран мәшәкатьле эш. Газоннарга өстәмә туфрак кертергә, аны тигезләп таратырга, хәтта чирәмне дә чәчеп һәм чүп үләннәреннән аралап үстерергә кирәк. Дөрес, соңгы елларда рулонлы, әзер газоннар җәю дә практикага кергән. Тик анысы да тәрбиягә мохтаҗ.

Шәһәр күркәмлеген югалтмасын өчен, газоннарны кимендә айга бер мәртәбә чабып тору таләп ителә.

Инде килсәк чәчәк түтәлләренә – чәчәклекләр ясау яшелләндерүчеләрдән төгәллек һәм фантазия сорый торган хезмәт. Дөрес, проектларны нигездә предприятиенең дизайнерлары әзерләп бирә. Әмма чәчәклекләрнең яшелләндерүчеләр идеясенә генә нигезләнеп ясалуы да бик мөмкин – декоратив үсентеләрдән эшләнгән бу “Әкәм-төкәм”не (рәсемдә), мисал өчен, Роза Сәлахетдинова үзе Мәскәүдән күреп кайткан була. Шушы ук 8нче участокның 3нче бригадасы карамагындагы “Эрмитаж” чәчәклегеШәһри Чаллы  Ризидә ГАСЫЙМОВА 2008-08-22 15:40:20
Кире кайт