shahrichalli.narod.ru

Россия һәм республика район-шәһәрләре ятимнәр йортында эшләүчеләр Чаллыдагы хезмәттәшләреннән тәҗрибә алырга еш киләләр. Бу атнада биредә Казаннан килгән белгечләр ятимнәрне тернәкләндерү ысулларын өйрәнделәр, сенсор бүлмә белән таныштылар.

“КАМАЗ-Мастер”да яңалык: команда, икегә бүленеп, 2009 ел башында “Дакар” һәм “Африка-рейс” узышларында катнашачак. Әлегә биш экипаж “Тын Дон-2008” раллиена җыена. Ростовта узачак әлеге ярышларда спортчылар дөньякүләм узышлар алдыннан үзләренең көчләрен сынаячак.

Бу шимбәдә Хәсән Туфан проспектында магистраль автопоезд йөртүчеләр конкурсы була. Анда Татарстаннан кала Түбән Новгородтан, Екатеринбург һәм Брянскидан барлыгы 18 команда катнаша. Җиңүче команданы – хаким кубогы, шәхси зачетта җиңүчене “ВАЗ-2107” автомобиле көтә.

“Таттелеком” республика компаниясе Чаллыга 900 миллион сум акча бүлеп биргән. Бу сумма кушылган телефон челтәрләрен цифрлыга алыштырырга мөмкинлек бирә. 60 мең телефон ноктасы заманча, сыйфатлы элемтә белән тәэмин ителәчәк.