“Барысы дүрт кеше: икесе – Ташчишмәдән, икесе Кенәрдән килеп эшләде­ләр. Инде зур эшләр тө­гәлләнде дип әйтергә була. Штукатурга килергә тиешләр, аннан буяу эше бар да, линолеум җәясе кала”, – дип аңлатып үтте мәктәп мөдире Сәвия Ягъдүт кызы Гайнетдинова. Без килгәндә мәктәп хезмәт­кәрләре җыештыру белән мәшгуль иделәр. Йөзләреннән елмаю китми, сөенечләре эчләренә сыймый – ничә ел ремонт күрмәгән мәктәпләре ме­нә нинди булган бит. Үзгә­решләр бинаның тышыннан ук башлана: түбәне яңартканнар, ерактан ук ялтырап тора, мәктәпнен керү өлешен зурайтып, биек итеп  эшләгәннәр. Эч­тә исә электр чыбык­ларын алыштыру эше бетеп килә, яңа ишекләр,  пластик тәрәзәләр куелган. Түшәмнәрне матур­лат­каннар, стеналарын ти­гезләгәннәр, кыскасы, мәк­тәп “ялт” итеп тора. Шундый якты һәм җыйнак булып калган. “Стенага такта кагырга куркыныч иде, җимерелеп төшәр дип, борчылып тордык. Хәзер рәхәтләнеп язабыз инде”, – шулай шатлыгы белән уртаклаша укытучы Дания Юныс кызы Халикова. Техник хезмәткәр Ну­рания Хисамиеваның да куанычы зур. Пешерү бүлмәсендә үзгәрешләр булган.  Стенасын яңадан өйгәннәр, плитка ябыштырганнар. Яңа электр пли­тәсе һәм суыткыч кай­тырга тиеш. “Колхозга рәхмәт, эшчеләрне ашау-эчү белән тәэмин ит­те. Төзелеш ма­териалла­рына кытлык бул­мады – китереп кенә тордылар. Җитәкчеләр дә килеп, кызыксынып торалар. Айрат Фәнил улы гел монда, Азат Мансур улы да булып китте”, – диде Сә­вия Гайнетдинова. “Әти-әниләрне чакырмады­гызмы соң, үзегез генә эшләп йөрисез”, – дип сорыйм. “Юк инде, безнең эш нәрсә ул, бераз җыештыру, тәртип­кә китерү  генә. Бөтенесен үзләре башкара бит”, – диләр.

Кызу эш өсте булса да, ремонт белән бергә, “Беренче кыңгырау” тантанасына да әзерлекне башлап җи­бәргәннәр. Укучыларны ча­кырып, мәктәп ишек алдында репетицияләр уздыр­ганнар. Бу уку елында мәктәп биш баланы каршы алачак. Барлыгы 12 бала белем ала биредә. Укучыларга да яңа, матур, якты мәктәптә уку рәхәт булыр. “Балалар булып торса, эшлисе дә эшлисе, Алла боерса. Менә киләсе елга чәчәклекләрне матурлап куярбыз, спорт мәйданчыгы да бар. Безгә укытырга, балаларга белем алырга шартлар тудырыл­ган”, – ди мөдир. Әйе, ут, су, газ кергән, мәктәптә җылы, укучылар бар – укытучыга бәхет өчен күп кирәкми. Яңартылган мәктәпләренең игелеген күреп, исән-сау булып, хез^­мәтләренең тәмен белеп эшләргә генә язсын. Укы­тучылар да, һәрвакыт, нәкъ бүгенгедәй, елмаеп торсыннар!