Октябрьдә Башкортостанның дәүләт суверенлыгы турында декларация игълан ителү хөрмәтенә уздырылган бәйгедә нәкъ менә Нурлат ат заво­ды аргамаклары Уфаның "Акбүз ат" ипподромын гөр китергәннәр. Рес­публиканың Физик культура, спорт һәм туризм министрлыгы призын Россиядә туган 3 яшьлек чиста то­кым 12 ат арасында 1800 метр ара­ны 1 минут 55 секундта үтеп безнең Братан туры айгыры яулаган. Мас­тер - жокей Алексей Волик иярләгән әлеге аргамак шулай итеп быел Са­мара ипподромында Дербиның Зур призын, С.М.Буденный призын һәм чабыш сезонын ябу призын отып, "Өчле таҗ"га ия булуы очраклы тү­геллеген раслады. Шулай ук Росси­ядә туган 2 яшьлек аргамакларның 1400 метрга узышында "Акбүз ат" ипподромы кубогын безнең Тенденция яулаган. Быелгы сезонда Казанда авыл хуҗалыгы министры, Самара­да "Беренче таҗ" призларын откан, башкалабызда "Беренче таҗ" һәм "Кубань елгалары" призлары өчен узышта икенче булып килгән әлеге туры бия бу юлы 11 ат көч сынашкан дистанцияне 1 минут 29 секундта чабып үткән. Уфа бәйгесенең муни­ципаль округ призы "Аламан-бәйге" призына 4000 метрга чапкан 10 ат арасында безнең Мэлан туры айгы­ры баш килгән. Әлеге дистанцияне 4 минут 33 секундта чабып узган әлеге аргамак быел Самарада Жокей клу­бы һәм Элита призларын откан, һәм Казанда ике бәйгедә 2-3 урыннарны алган иде. Шунысын да әйтик, соңгы ике атның әтиләре үзебезнең атак­лы Эрожн булса, Мэланның анасыда - безнең Метрика. Башкортостан Авыл хуҗалыгы министрлыгының призы да әздән генә Нурлатка китми калган бу бәйгедә. 2000 метрга ча­бышка чыккан 9 ат арасында безнең Казан Сабантуе призын откан, баш­каланың тагын ике бәйгесендә 2-3 урыннарны алган Равил кушаматлы туры айгырның баш киләчәге бәхәс­сез булган. Тик шул ук жокей Алексей Волик утырган иярнең шуып китүе аркасында гына икенче урын белән канәгатьләнергә туры килгән. Әмма Татарстан һәм Башкортостан атла­ры арасында күптәннән килә торган көндәшлекнең юкка гына түгеллеген раслау өчен бер көндә өч беренче бүләкнең Нурлатка китүе дә - гаять зур казаныш.