Команданың энтузиастлары көз җитү белән тартманы уенга әзерләделәр, анда боз катырып, кардан чистартып тордылар. Билгеле, ачык һава астындагы мәйданчыкта боз 3-4 ай гына саклана, бу вакытта тупланган тәҗрибә җәй көне юкка чыга иде.
Бүген, район үзәгендә “Юбилейный” боз сарае ачылгач, инде күнегүләрне, уеннарны да ел дәвамында үткәрербез дип ышанабыз. Моның өчен бөтен шартлар да бар. Якын арада яңа махсус спорт киемнәре дә кайтырга тиеш. Тренерлар да ярдәм итә.
Әмма безнең хоккей командасында уйнаучыларны бер мәсьәлә борчый. Боз сарае ачылгач, биредә балалар һәм яшүсмерләр командалары оешты. Ләкин ир-атлар командасы һаман да элеккеге составта уйный. Безгә яңа уенчылар кушылмый, яшьләр килми.
“Чирмешән” командасы уенчылары: Риф Зарипов, Фәнис Иляев, Сергей Овсянников, Марат Яббаров, Иван Тузилов, Василий Кузьмин, Рәмис Шириазданов, Ядъкәр Рәхимов, Юрий Сергеев, Рафаэль Шәфигуллин, Юрий Кандеев төрле оешмаларда эшлиләр, ләкин спорт белән шөгыльләнергә дә вакыт табалар. Без атнага ике тапкыр: сишәмбе һәм пәнҗешәмбе дә кичке сәгать җидедә күнегүләр үткәрәбез, ә якшәмбе көнне, нигездә, ярышлар уза. Теләүчеләр булса, безгә кушылырга чакырабыз. Кич буе телевизор каршында утырганчы, 2-3 сәгать спорт белән шөгыльләнү, бозда шуу искиткеч зур канәгатьләнү бирә, сәламәтлек өчен дә файдасы бик күп. Билгеле, хоккей – кырыс уен, һәр очрашу диярлек кискен көрәштә уза. Һәр команда җиңәргә омтыла. Безгә әле тәҗрибә җитеп бетми. Бер-береңне ярты сүздән, бер караштан аңлый башлаган очракта гына уңышларга тиз ирешеп була.
Марат Яббаров,
“Чирмешән” хоккей командасы уенчысы
Кире кайт
|