Сәлам  Тольяттидан!

Исәнмесез, хөрмәтле «Хезмәт» газетасы редакциясе хезмәткәрләре. Сезгә сагынычлы солдат сәламнәре белән рядовой Рәйхан Низамов хат яза дип белерсез. Сезнең газета аша сәламнәремне туган якка, иң якын кешеләремә юллап калам.

Үзем Казан шәһәренең 5561 нче номерлы хәрби бүлегендә хезмәт итсәм дә, бүгенге көндә Тольятти шәһәренең 6622 «Б» номерлы хәрби бүлегендә кече сержант исемен алу буенча курсларда укыйм. Туган илнең, якыннарның кадере алардан аерылгач нык сиздерә икән. Әниемнең, кеше хәлен кеше белми, үз башына төшмәсә, дип әйтүенең мәгънәсенә хәзер генә төшендем. Сагындыра, бик сагындыра... Ләкин туган ил каршындагы бурычны үтәү ир-егет өчен иң әһәмиятлесе. Исән-сау әйләнеп кайту бәрабәренә кичергән бу сагыну хисләре татлы да, сагышлы да.

Тиздән Әниләр бәйрәме якынлаша. Шушы форсаттан файдаланып, барлык аналарга, беренче тәрбиячем Венера Ягъфәровнага, укытучыларым Ләлә Фәйзелгаяновна белән Наилә Камиловнага бәйрәм котлаулары  юллап калам. Ә иң кадерле кешем — газиз әниемә бу шигырь юллары бәйрәм котлавы булып барып ирешер дигән теләктә сезне бик сагынып һәм хөрмәт итеп Рәйхан Низамов дип белерсез.

Шода—Тольятти.