"Дуслык" ("Дружба", "Туслах") район газетасы өч - татар, рус, чуваш телендә, атнага өч тапкыр чыга, тиражы 10300 данә. 2005 елның февраленнән газетаны С.Н.Хәйруллина җитәкли.

Газета ТРның матбугат, телерадиотапшырулар һәм массакүләм мәгълүмат чаралары министрлыгы тарафыннан теркәлгән.  Теркәлү турындагы таныклыкның номеры 34.

Газета "Идел - Пресс" полиграфия - нәшрият комплексы" ААҖндә басыла (420066, Казан шәһәре, Декабристлар, ур. 2), күләме 1 басма табак.

Район газетасы 1931 елда чыгарыла башлый. Ул өч тапкыр исемен алыштыра, башта "Октябрь колхозчысы", соңрак "Коммунизм төзүчесе", һәм аннан "Дуслык" дип йөртелә башлый. "Дуслык" газетасы республиканың район газеталары арасында беренчеләрдән булып компьютерда җыю һәм версткалауга күчте. Газетаның тышкы йөзе, полиграфик бизәлеше тамырдан үзгәрде. Һәм хәзерге вакытта газета дизайн өлксендә эзләнүләр алып бара, газета стиленең яңа багланышлары күзәтеп барыла.

"Түгәрәк өстәлләр" укучылар, штаттан тыш хәбәрчеләр белән аралашуның популяр формасына әверелде.

Төрле тармаклар эшчәнлеген яктыртып барганы өчен алган бүләкләре газетаның киң даирә мәнфәгатьләрне колачлавын дәлилли. Мәсәлән, болар - 2003 елда ТРның Архитектура  һәм ТКХ министрлыгы дипломы, РФ Пенсия фондының "Пенсия тематикасына багышланган иң яхшы язма өчен" III дәрәҗә дипломы, 2003 елда "Татэнерго" һәм ТР Журналистар берлегенең "Многоликая энергетика" конкурсыныңдагы диплом, "Бәллүр каләм - 99" конкурсының "Иң яхшы район газетасы" номинациясендә лауреат исеме,  2004 елда "Кеше һәм табигать" конкурсының  "Вакытлы басмаларда иң яхшы язма" номинациясендә II дәрәҗә диплом һ.б.лар.

Газета битләрендә район тормышы, аның уңышлары, шатлыклары - барысы да яктыртыла, проблемалы мәсьәләләр дә күтәрелә. Газетаның мәгълүмати даирәсе үз эченә көн кадагына суккан аналитик, актуаль, объектив материалларны ала, район һәм шәһәр яңалыкларын, вакыйгаларны  укучыга оператив төстә җиткерә. Беренче биттә - "Кичә. Бүген. Иртәгә" сәхифәсе мәгълүматлары һәм "Сишәмбедән сишәмбегә" фотохәбәрләр тупланмасы, "Алтынчы баган" яңалыклар җыелмасы. "Коммуналь реформа гамәлдә", "Җирле үзидарә", "Депутат хозурында", "Социаль яклау", "АПК хәбәрләре", "Пенсия фондыннан", "Кеше һәм закон", "Мәдәният", "Мәгариф", "Эшмәкәрләргә",  "Кызыл. Сары. Яшел", "Эшлекле даирә" һ.б. рубрикалар даими чыгып тора, Экология, сәламәт яшәү рәвешен пропагандалау темалары кискен публицистик төсмердә бирелә ("Шәһәр экологиясе", "Экология", "Спорт күзәтүе", "Наркотикларга - юк дибез!" рубрикалары). Нурлаттагы уку йортлары, һөнәри лицей, югары уку йортлары филиаллары турындагы мәгълүматлар яшь укучыларга социаль ориентир өчен кулай.  "Сорау - җавап", "Диалог: укучы - газета" рубрикаларында укучылар үзләрен кызыксындырган сорауларга җаваплар алалар. 2004 елда Җиңүнең 60 еллыгы алдыннан  газетада "Бөек Җиңүнең 60 еллыгына" рубрикасы ачылды. 2005 елның мартыннан маена кадәр укучылар арасында сугыш турындагы иң яхшы материалга конкурс үткәрелде. Конкурс материаллары газетаның махсус битләрендә басыла.

Гаезтаның һәр телдә чыгучысында да (татар, рус, чуваш) үз әсәрләрен "Литературная суббота", "Нурлы як" сәхифәләрендә биреп баручы авторлар бар.

2006 елда Нурлатның "Дуслык" газетасы үзенең 75 яшьлек юбилеен билгеләп үтте. Газета шул чор эчендә бай тәҗрибә туплап өлгерде, аның үзенә генә хас традицияләре бар. Газета коллективы зур иҗади потенциаллы тәҗрибәле белгечләрне дә, яшьләрне дә берләштергән. Алар һәрчак кызыклы  темалар, яңарышлар эзләүдә.