"Кама ягы" газетасы "Камская новь" газетасыннан тәрҗемә ителә. Лаеш районында татар телендә беренче газета "Большевистик юл" исеме астында чыга. Аның беренче саны 1945 елның 23 апрелендә дөнья күрә. Ул елларда төп газетаның редактор М.Мостафин була. 1965 елдан ул  "Кама ягы" исеме астында чыга."Кама ягы" газетасында озак еллар тәрҗемә буенча редакторы булып эшләгән М.И.Әминова татар газетасына күп тырышлыгын, көчен бирә. Газета кулдан да, линотипта да җыела. Ә хәзер барысын компьютер эшли. "Кама ягы" атнага ике тапкыр чәршәмбе һәм шимбә көннәрендә А-3 форматы белән 4-8 битле булып басыла. Газета битләрендә район тормышының һәр ягы: авыл хуҗалыгы, сәнәгать предприятиеләре эшчәнлеге, төзекләндерү, мәдәният, спорт, сәламәтлек, әйләнә-тирә мохитны саклау, укучыларыбызны борчыган мәсьәләләр киң яктыртыла. Һәм, әлбәттә инде, хезмәт кешесенә зур урын бирелә. Татарча килгән хатлар игътибар үзәгендә. Газетада яшьләрне борчыган мәсьәләләр дә күтәрелә, мәктәп укучылары иҗатына да битараф түгелбез.