Саба  район газетасы 1930 елның 25 ноябрендә  чыга башлый. 1930  елның 10 августында  Саба районы  оештырылганнан  соң район  матбугатын булдыру  зарурлыгы  туа. Татарстан өлкә  комитеты  Сабага  редактор  итеп  Зыя Маликовны  җибәрә. Район Советы  башкарма  комитеты  секретаре  булып эшләгән  Гыйльмулла Әхмәдуллин  да редакциягә  күчерелә. Типография  эшен җайга  салу  өчен Казаннан Локман Хәйруллин килә.  Ул газетаның беренче юлларын җыя. Хәлил  исемле  кеше  бастырып чыгара. Газета  "Колхоз байрагы"  дип йөртелә  башлый  һәм 1963 елда гына  "Җиңү  байрагы"  дип үзгәртелә (1990 елның 23 сентябреннән - "Саба таңнары").

Район газетасы  беренче елларыннан матбугат эшендә  катнашучыларның  актив  булышлыгы  белән  чыга. Тимергали  Фәттахов, Газиз Закиров, Газиз  Мәрданов, Гайсә  Усманов, Шәкүр  Әхмәтҗанов, Җәмил  Шәфыйков,  Бари  Әсфәндияров, Хәбиб Рәхмәтуллин, Әхмәт Галимов, Габдуллаҗан  Гатауллин, Гыйлаҗ Зыятдинов,  Шәйхи  Садыйков, Хәмидулла Хуҗин һәм  башкалар  утызынчы елларның  актив  авыл хәбәрчеләре  булалар.

Редактор  һәм типография  директоры  булып  төрле  елларда  Гыйльмулла  Әхмәдуллин, Саимә  Кәримова, Нәсих  Абдуллин,  Дәүләт  Мөхәммәтшин, Федор  Степанов, Габдерахман Галиәкбәров, Газиз Нәбиуллин (СССР Язучылар берлеге әгъзасы, балалар өчен  дистәләгән  китап авторы), Кәрим  Сафин, Тимершәех  Әхмәтшин, Хөснулла Шәфигуллин, Федор Ермаков, Хәбибрахман  Кәримов, Хәтимә  Дәминовалар  эшли.

1981 елдан  коллективка ТР Язучылар берлеге  әгъзасы, дистәгә  якын  китап авторы, Татарстан  Республикасының  атказанган мәдәният хезмәткәре,  журналистларның  Х.Ямашев  исемендәге  бүләге иясе  Тәлгат   Нәҗмиев  җитәкчелек итә.

Газета  бүген дә  үзенең  хәбәрчеләре  белән  көчле. "Саба  таңнары"  1990 елда  хәбәрчелек  хәрәкәтен  оештыручы  буенча республикада иң нәтиҗәле эшләүче  редакцияләрнең  берсе  булып танылды. "Эшче  һәм авыл  хәбәрчеләре  хәрәкәте: Саба  һәм  Түбән Кама  модельләре"  дип  аталган  брошюра  да басылып  чыкты.

Газетаның  иң актив  хәбәрчесенә 1967 елдан  башлап  ел саен Закир  Йосыпов  исемендәге  премия бирелеп  килә. Әлеге  бүлеккә 40тан артык  хәбәрче  лаек  булды. Шулай ук  "Мишә дулкыннары"  берләшмәсе  әгъзаларының  иҗаты  да район  матбугатының  эчтәлеген  төрләндерүгә һәм  әдәби  әсәрләргә  баетуга  сизелерлек  йогынты  ясый.

 "Саба таңнары" "Елның  иң яхшы  газетасы"  республика  конкурсында  берничә  мәртәбә  җиңүче  булды. ТАССР Югары Советы (1990 ел) һәм  Татарстан  Республикасының  Мактау  грамоталары  белән  бүләкләнде.

2005 елда  газетаның  75 еллыгы  билгеләп үтелгәндә  коллективка  Татарстан Республикасы Президентының  Рәхмәт хаты  тапшырылды.

Редакция  каршында 2001 елдан матбугат  музее эшләп килә.

 "Саба таңнары"  газетасы  районның  социаль-икътисадый  үсеше  мәсьәләләрен  хәл итүдә,  халыкның  мәдәниятен, рухи  культурасын  күтәрүдә  мөһим роль уйный.

Тиражы  3500 данә,  атнаның  чәршәмбе  һәм шимбә  көннәрендә  чыга.

Адресы: 422060, ТР, шәһәр  тибындагы  Байлар Сабасы  бистәсе, Гали  Закиров урамы, 78.

Телефон  (факс): (262) 2-30-58.